Средба Герапетритис-Фидан на маргините на Самитот на ПСЈИЕ во Скопје

На маргините на Самитот на Процесот за соработка во Југоисточна Европа (ПСЈИЕ), што вчера се одржа во Скопје, средба оствариле министрите за надворешни работи на Грција и Турција Јоргос Герапетритис и Хакан Фидан, јави дописничката на МИА од Атина.

Според грчката новинска агенција АНА-МПА, на средбата што траела околу 20 минути, станало збор за ситуацијата на Блискиот Исток, особено за текот на преговорите по предлогот на САД за примирје во Газа, разговарале и за ситуацијата во Украина во пресрет на Мировната конференција во Швајцарија во текот на викендот, како и за билатералните прашања.

Се фокусирале на соработката на двете страни во миграцијата, а го разгледале и напредокот на билатералниот договор за издавање туристички визи за турски државјани на десет грчки острови.

Герапетритис и Фидан, како што пишува АНА-МПА, се сретнаа во пресрет на НАТО Самитот на 9 и 10 јули во Вашингтон и каде што можна е нова тет-а-тет средба на премиерот на Грција, Киријакос Мицотакис и претседателот на Турција Реџеп Таип Ердоган.

14.06.2024 - 09:26

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега