Сопругата на Зеленски хоспитализирана поради Ковид-19
Сопругата на украинскиот претседател Володимир Зеленски, Олена Зеленска, е хоспитализирана со Ковид-19 и пневмонија, соопшти денеска претседателскиот Кабинет.
Состојбата на Зеленска (42) е стабилна, има билатерална пневмонија со „умерена сериозност“ и може да дише без респиратор, се вели во соопштението.
Украинските медиуми пред четири дена јавија дека сопругата на украинскиот претседател е позитивна за коронавирусот, а кабинетот на претседателот подоцна соопшти дека се тестирани и Зеленски и нивните деца, и оти биле негативни.
Во првите денови Олена Зеленска немала никакви симптоми и се чувствувала добро.
Во Украина досега има повеќе од 30.000 заразени со коронавирусот, од кои повеќе од 900 лица починале.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа