Се огласи Навални: Ме префрлија во најстрог затвор
Алексеј Навални, политичкиот опонент на Владимир Путин, на „Телеграм“ откри каде се наоѓа. Тој соопшти дека е префрлен во друг затвор и дека е во карантин.
Во објавата посочува дека е префрлен во затворот ИК-6, кој е максимално обезбеден, пренесува агенцијата АП. Затворот се наоѓа во селото Мелеково во Владимирската област, на околу 250 километри источно од Москва.
Затворот во кој сега се наоѓа Навални е 150 километри од строгиот руски казнено-поправен дом во градот Покрово. Таму затворениците мора да стојат со часови.
„Моето вселенско патување продолжува. Се селам од место до место. Затворен сум во најстрогиот затвор и сум во карантин“, напиша Навални, но не откри какви се условите во затворот.
Навални вчера исчезна од казнено-поправниот дом каде досега беше затворен, а неговиот тим соопшти дека не знаат каде се наоѓа. Навални беше уапсен минатата година кога се врати од лекување во Германија каде заврши откако беше отруен со „новичок“.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа