Расправа за Предлог-буџетот за 2021, власта и опозицијата со спротивни аргументи
Расправата за Предлог-буџетот за 2021 година на првиот ден од разгледувањето во собраниската Комисија за финансирање и буџет помина со забелешки од страна на опозицијата дека се работи за неразвоен Буџет без визија и укажувања од страна на парламентарното мнозинство дека е насочен кон поддршка на здравството, економијата и граѓаните.
За опозицијата, предложениот буџет за следната година е нереален и строго партиски и со него нема да се поддржат реалниот сектор и граѓаните, додека за пратенците од власта буџетот е континуитет на одговорните и домаќински политики на Владата предводена од СДСМ. Со Буџетот, како што посочија пратениците од власт, се обезбедува одржливост, но и можности за побрзо надминување на негативните последици од корона кризата.
Бојан Стојаноски од ВМРО-ДПМНЕ посочи дека планираниот Буџет за 2021 година дополнително ќе ја зголеми сиромаштијата во државата, бидејќи како што рече, е неодржлив, креиран без концепт и е поставен на постулати кои не се одржливи.
– ВМРО – ДПМНЕ како во ребалансот, така и сега, ќе учествува во оваа расправа за буџетот со цел и желба да помогне. Поднесовме 390 амандмани, а заедно со другите опозициски парламентарни партии имаме над 450. Во тие амандмани се водевме по три приоритети – заштита на здравјето на граѓаните, вистинско стиумулирање на економијата преку капитални инвестиции и заштита на населението преку спречување на аерозагадувањето и загадувањето на животната средина, истакна Стојановски.
Додаде дека е поприоритетно да се набават 50 амбулатни возила место да се трошат пари за набавка на возила за претседатлот на државата и да се направат ПЦР тестови бесплатни наместо да се наменат пари за вработување во министерствата.
Министерот за финансии Фатмир Бесими во репликата на Стојановски не се согласи со констатацијата дека буџетот е без визија и концепт.
– Ова е првпат во Собранието покрај буџетот да има и среднорочна петгодишна рамка со проекции и тоа во време кога најтешко е да се проектираат работите. Сакаме со овој буџет да поддржиме политики кои ќе генерираат двојно повисок раст. Ако во изминатите 10 години растот во просек е два-два и пол отсто, сакаме да постигнеме раст 4 до 5 отсто. Сметаме дека нашиот модел на економија може да генерира ваков раст, истакна Бесими.
Од Алијанса на Албанците сметаат дека буџетот може да е тешко остварлив бидејќи и голем дел од антикризните мерки не се адекватни. Според Аднан Незири, треба да се направи намалување на непродуктивните расходи, а во проектираниот буџет има и расходи за договорни услуги за кои нема никакво објаснување.
Диме Велковски од СДСМ посочи дека со Предлог-буџетот ќе продолжат инвестициите во економијата и борбата за спас за работните места, а ќе се вложуваат средства и во здравството, образованието, социјалната заштита и рамномерниот регионален развој.
Расправата во Комисијата, согласно Деловникот треба да заврши за 10 работни дена.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа