Протест на „Еурокомпозит“: Бараме чин на добра волја од Владата за отпремнините

Работниците прогласени за технолошки вишок во „Еврокомпозит“ денеска протестираа во Прилеп барајќи од Владата, како што рекоа, чин на добра волја за исплата на отпремнините додека се решава ситуацијата со компанијата.

– Премиерот Зоран Заев рече дека го помага и ќе го помага „Еурокомпозит“ додека не излезе од кризата. Имало два стратешки партнери, требало да се реши за еден месец. Ако не, Владата ќе одвои три милиони евра за проблемите на „Еурокомпозит“. Го замолувам премиерот за знак на добра волја, во текот на наредната недела да се одвојат барем 150.000 до 200.000 евра за да ни се плати отпремнината и да видиме дека навистина работите почнуваат да се решаваат, изјави Пеце Велјаноски од Иницијативниот одбор.

Работниците не отстапуваат од барањата за исплата на отпремнините и на заостанатите плати и придонеси.

– За поздравување е најавата на премиерот да се реши ситуацијата. Но, што со фирмата која треба да ги исплаќа и отпремнините и платите кога во моментов нема струја поради напластените долгови. Од каде ќе ни се исплаќаат побарувањата, ако „Еурокомпозит“ не работи. Не се откажуваме од барањата, вели Цветан Бунтески.

Работниците денеска имаа средба со прилепската пратенчка Кети Смилеска, која најави наскоро решавање на проблемот. 

 

 

 

Добивајте вести на Viber

01.02.2019 - 15:04

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега