„Патот до Брисел преку Охрид“ – се одбележуваат 17 години од Рамковниот договор

 

Тематски панел „Патот до Брисел преку Охрид“ во рамки на одбележувањето 17 години од потпишувањето на Охридскиот рамковен договор ќе се одржи денеска во Клубот на пратеници во организација на Секретаријатот за европски прашања.  

- Денес, Република Македонија е исправена пред еден од најважните предизвици во својата понова историја - да ја комплетира својата надворешна интеграција. Преку овој панел ќе се обидеме да создадеме врска меѓу Охрид, како симбол на внатрешната интеграција, и Брисел, кој ја симболизира нашата надворешна интеграција, т.е. нашата аспирација за полноправно членство во НАТО и Европската унија, информираат од Секретаријатот за европски прашања.  

На панелот, како што е најавено, ќе се обратат претседателот на Владата на Република Македонија, Зоран Заев, претседателот на Демократската унија за интеграција, Али Ахмети, како и сер Барни Вајт Спунер, поранешен Генерал на Британската армија и поранешен командант на НАТО во Република Македонија, за време на потпишувањето на Рамковниот договор.

Специјален гостин на панелот ќе биде и Евелин Фаркаш, поранешната заменичка на помошникот секретар за одбрана на САД, задолжена за Европа и Азија во администрацијата на Обама, одговорна и за политика на САД кон Балканот.

Евелин денеска е виш член на Атлантскиот совет, постојан аналитичар за национална безбедност за најголемата медиумска куќа во САД - NBC/MSNBC и претставува исклучителен политички авторитет, американски аналитичар и контрибутор и во бројни други американски и светски медиуми како што се CNN, FOX, Politico, Foreign Affairs...

На панелот ќе учествуваат и Дафина Јовановска - Стојановска, пратеник во Собранието на Република Македонија, како и претставник на опозициската ВМРО-ДПМНЕ, партија потписник на Охридскиот рамковен договор.

Говорниците низ темата на панелот ќе ги води заменик-претседателот на Владата, задолжен за европски прашања Бујар Османи, кој од неодамна е и главен преговарач со Европската Унија. 

 

 

 

13.08.2018 - 08:00

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега