СДСМ „распали“ по градоначалниците на ВМРО-ДПМНЕ: Во нивните општини се случува партизација и расипничко трошење на парите на граѓаните
Хаосот што му се случува на Град Скопје е само пример како ВМРО-ДПМНЕ владее со секоја општина, oбвинуваат од владејачката СДСМ во соопштение испратено до медиумите.
„Хаос, самоволие и нефункционалност се случува речиси во секоја општина каде ВМРО-ДПМНЕ ја има локалната власт.
Наместо решенија, наместо реализација на проекти, во општините раководени од градоначалници од ВМРО-ДПМНЕ се случува партизација, зголемување на цените на услугите, злоупотреба на службената положба и расипничко трошење на парите на граѓаните“, велат од СДСМ.
„Во општина Штип градоначалникот Иван Јорданов и мнозинството во Советот од редовите на ВМРО-ДПМНЕ го зголемија данокот на промет на недвижности од три на четири отсто, откако претходно го поскапеа такси превозот и трошокот за ѓубретарина.
Во Ѓорче Петров, во ек на најголема економска криза, градоначалникот ќе потроши 100.000 евра за опремување на нова општинска зграда.
Во Битола и Прилеп возила од јавни претпријатија се злоупотребуваат за одење по свадби, но и за приватни патувања во и надвор од државата.
Во Прилеп е зголемена цената на јавниот превоз, на паркингот и на комуналните услуги, како и цените за фирмарина и поставување урбана опрема, а зголемени цени на комуналните услуги има и во Радовиш и Виница, но и во неколку други помали општини.
Градоначалниците од ВМРО-ДПМНЕ се симбол за неработење, за расипничко трошење на народните пари“, стои во реакцијата на СДСМ.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа