Пауновски: Оние протоколи кои не се применливи за угостителите, можно е да бидат променети

Угостителските објекти од вчера се отворени за гости, но мора да почитуваат одредени протоколи за работа. Во спротивно, ќе бидат санкционирани од страна на Државниот пазарен инспекторат. За начинот на контролирање на работата на угостителите, денес во Скопски агол на „Утрински брифинг“ на „Слободна ТВ“ зборуваше директорот на ДПИ, Стојко Пауновски

-Протоколите ги носат Комисијата за здравство и Владата, но во нивната изработка учествуваат и синдикатите на угостителите. Ние како орган сме надлежни да го контролираме спроведувањето на протоколите. ДПИ не сака секогаш да казнува. На почетокот ќе се потрудиме протоколите да бидат применливи. Оние протоколи кои не се применливи, односно угостителите ќе им биде тешко да ги применат и над кои не можеме да извршиме надзор, можно е да бидат променети. Таков е примерот за ограничувањето на бројот на гости на една маса и проверка на нивната роднинска врска. Исто така, протоколот вели терасите да бидат отворени од три страна. Тука на улица Македонија сите тераси се отворени само од една страна. Значи ќе мора да претрпат измени, рече Пауновски.
Тој посочи дека инспекторите веќе од денес ќе одат во посета на објектите и заедно со менаџерите и газдите ќе се обидат да најдат заеднички јазик околу примената на протоколите.

-На првата владина седница можно е да бидат изменети протоколите. Ќе има и едукација за примена на протоколите. Никој не може да ги легитимира граѓаните при влез во ресторан, освен малолетните лица кои ќе побараат алкохол, објасни Пауновски.
Тој додаде дека биле казнети многу објекти кои не ја почитувале забраната за работа за време на кризата.

– Околу 300 објекти се затворени и дадени се платни налози за плаќање глоба, поради прекршување на забраната за работа, посочи Пауновски.