ФОТО: Скопје блесна на Бела Ноќ - погледнете што се случуваше во центар

Вчера вечерта, традиционално, се одржа манифестацијата Бела Ноќ 2013, која официјално беше отворена со поставката во Музејот на град Скопје, изложба на ремек дела од македонската современа уметност. На изложбата, насловена „Уметникот и диктатурата“ присуствуваше и градоначалникот на Град Скопје, Коце Трајановски.

- Дозволете ми најнапред да ве поздравам од мое лично име и од името на граѓаните на Скопје, да го изразам задоволството што ја имам честа да го најавам 9 то издание на манифестацијата, која го доближува Градот Скопје до современите пулсирања на големите европски метрополи кога станува збор за  славењето на уметноста. И оваа Бела ноќ, Младинскиот културен центар и Градот Скопје организираат вечер за паметење. По деветти пат скопјани ќе имаат можност да уживаат во спектакуларен централен настан кој го одзема здивот, како и во повеќе презентеции на врвни уметнички достигнувања на македонски автори, но и уметници од странство. Градот Скопје на 20 локации во централното градско подрачје ќе понуди уметнички, но и спортски содржини, силно промовирајќи го добриот вкус и отфрлајќи го кичот. Верувам дека, не само содржините што се нудат, туку и скопјани ќе дадат свој придонес кон осветлувањето на оваа ноќ. И оваа година Скопје се потврдува како балкански лидер во организирање на ваков тип манифестации, не само затоа што прв на Балканот доби своја Бела ноќ, туку и затоа што добива настани на кои што се застапени повеќе области на културата, рече градоначалникот Трајановски, искористувајќи ја приликата и официјално да ја прогласи за отворена „Бела Ноќ 2013“.

Во рамки на Манифестацијата „Бела ноќ 2013“, што и годинава е во организација на Младинскиот културен центар - Скопје, а се одржува традиционално под покровителство на Град Скопје, светската атракција Commandos Percu одржа и спектакуларно музичко - пиротехничко шоу, насловено како “Bombs per minute”. Шоуто  се одржа на преполниот плоштад Македонија.

-Повеќе од 15 години оваа трупа патува по светот со својот перкусионизам и специфична умешност со огнометот. Фузијата од музика и огномет е нивниот главен механизам. Јазикот што е и нов и прастар, минува низ неколку култури и жанрови.Третиот елемент што се појавува е движењето, т.е. уметноста на изненадувањето, кое ги води музичарите/пиротехничарите до поголем предизвик, што го верифицира и името на трупата. Скопјани беа сведоци на голем музичко-сценски спектакл проследен со константно пиротехничко шоу. По подолг период, на Бела ноќ се приклучуија и дел од националните установи, а како и изминатите години, така и оваа, скопјани можеа да се насладуваат на уметноста, од сите области:музика, филм, поезија, модерна уметност, мода, информираат од Град Скопје.