Дејвид Камерон: Не знам колку чини лебот бидејќи сам го месам

Премиерот на Британија Дејвид Камерон изјави дека не знае колку чини лебот, затоа што сам го меси и пече.

Камерон, кој се школувал во елитниот колеџ Итон и на Универзитетот Оксфорд, изјави дека не купува леб, затоа што користи домашна машина за месење и печење, а брашното го купува од воденица во својот изборен округ, во југот на Англија.

- Го ставате брашното во машината за леб, го местите тајмерот за да се вклучи машината во текот на ноќта и кога ќе се разбудите, преубав мирис се шири од кујната. Потребно е само 30 секунди да ставите состојки во машината, изјави премиерот за лондонското Радио LBC. Тој додаде дека неговите три деца го „обожуваат неговиот домашен леб“.

Водителот на радио-програмата сепак го информираше премиерот дека лебот во продавница чини 47 пени (0,56 евра).

Лондонскиот градоначалник, Борис Џонсон, исто така поранешен ученик на Итон и Оксфорд, призна за радиото дека не ја знае цената на млекото.

Кога му било кажано дека млекото чини половина помалку отколку што тој проценил, Џонсон рече: - Ете, јас не ја знам цената на млекото, па што?

Потпретседателот на опозицијата, Лабуристичката партија, Мајкл Дагер за истото радио изјави дека премиерот „нема врска со реалноста“.

- Единствено изненадување беше што рече дека има машина за печење леб. Поголемиот дел од луѓето би претпоставиле дека тој има барем фурна, а не само таа машина, рече тој.

На Британските политичари често им се поставуваат прашања за цените на продуктите се со цел за да се провери дали знаат како живеат нивните сограѓани.