КСС: Да се реши кризата и да се зачува унитарноста на државата

Конфедерацијата на слободни синдикати на Македонија (КСС) изразува загриженост за политичката криза и бара побрзо решение за излез од сегашната состојба и стабилизирање на државата по сите основи со максимален ангажман од сите одговорни фактори во рамки на уставните и законските надлежности.

Притоа, истакнува КСС, строго да се води сметка за зачувување на унитарноста на државата, што е темелен принцип вграден во Уставот на Република Македонија, како и рамноправноста на сите граѓани на нашата земја, според принципот на мултиетничност, со што се гарантирани  правата на сите граѓани кои живеат во Република Македонија, што значи на Македонците, Албанците, Турците, Србите, Ромите, Бошњаците и Власите.

– КСС  цврсто стои на определбата и одбраната на уставните принципи и гаранции со кои е утврдено дека нашата земја е заедничка држава за сите што живеат во неа, а според тоа и сите имаме и обврска заеднички да ја градиме и да ја чуваме. Согласно статутарните определби, кои произлегуваат од начелата на Уставот и законите на нашата држава, како и на меѓународните конвенции, КСС ги повикува членовите од синдикатите кои се членки на Конфедерацијата, како и членовите на другите синдикати кои се организирани во други сојузи или се самостојни, активно да се вклучат во одбраната на стабилноста и унитарноста на нашата заедничка држава, се вели во соопштението.