Белата чума коси во Македонија
Белата чума коси во Македонија. Државата е пред сериозен демографски предизвик. Нацијата старее, наталитетот се намалува, а се зголемува смртноста.
Македонската жена раѓа едвај по две деца. Од ‘80-тите години во минатиот век, Македонија влезе во земјите со низок наталитет. Многудетноста која некогаш беше вообичаена, сега е далечно минато. Експертите алармираат- процесот што почнал со миграциите село град мора да запре, бидејќи жената од градот раѓа помалку од онаа на село, ама и сѐ помалку младите склопуваат бракови. Истовремено, се забележува раст на бројот на разводи, пишува Лидер.мк.
Од 27 илјади живородени деца пред 5-6 години, статистиката покажува дека веќе сега бројката е спуштена на 23-24 илјади… и тука некаде стагнира. Нашиот наталитет од 11,4 промили е понизок од голем број развиени земји во Европа. На пример Шведска има над 14, Франција и Исланд- 16.
Статистиката покажува дека на удар најмногу се Пелагонискиот, Источниот и Вардарскиот регион. Ако во ‘94 -та се родиле 31.421 бебе, лани на свет дошле само 23.568.
Падот на наталитетот во некои општини изнесува 60, 70 или 90 проценти- факт кој сериозно загрижува. На пример, Македонски Брод во 1962 година имаше 516 родени бебиња, а во 2013 година само 41 родено бебе. Тоа е фрапантен пад од 92 %.
Општина Берово во 1962 година имала 429 родени деца, а само 7.000 жители, а во 2013 година има одвај 105 родени, а 13.000 жители. Математиката покажува дека тоа е за 4 пати помалку.
И општина Струмица се соочува со огромен пад од 63%. Во 1962 година имала 1.872 родени деца, а во 2013 година само 685 бебиња.
Прилеп минатата година добил едвај 737 новородени бебиња, а во 1962 година имал дури 2.286. Се соочува со намалување за 68%.
Економската моќ не е пресудна за природниот прираст
Податоците на Државниот завод за статистика за третиот квартал од годинава, покажуваат дека бројот на родените во земјава пораснал за 1%, во споредба со истиот период од минатата година. Општините Чаир, Гостивар, Тетово со највисок наталитет. Потфрлија Карпош, Кисела Вода, Берово и Крива Паланка. Имаат најнизок наталитет и најголем минуси во природниот прираст во третиот квартал годинава.
целиот текст прочитајте го на Лидер.мк.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа