45 годишнина на Факултетот за драмски уметности
Факултетот за драмски уметности (ФДУ) со свечена академија и средба на генерации во Скопје и со меѓународна конференција во Охрид, викендов одбележува 45 години од своето постоење.
ФДУ од утре до 6 ноември ќе биде домаќин на 23. „Скомрахи“ - Меѓународни средби на студенти од факултетите и академиите за драмски уметности, на кои ќе гостуваат студенти од Белград, Сараево, Загреб, Приштина, Софија и Љубљана.
Средбите ќе почнат и ќе завршат со претстави на македонски студенти - на отворањето в понеделник ќе биде изведена „Азизнаме“, испитна претстава на студентите по актерска игра во класата на проф. Елјеса Касо на ФДУ, а за затворањето во четврток со „Мизантроп“ - испитна претстава на студентите по театарска режија во класата на проф. Дејан Пројковски од Универзитетот ЕСРА.
Деканот на ФДУ Лазар Секуловски на прес-конференција во петокот најави дека „Скомрахи“ ќе понуди богата програма, особено филмска. Дел од проекциите ќе бидат на ФДУ, а дел во Кинотеката на Македонија. Театарските претстави ќе бидат на ФДУ, освен претставата на ЕСРА која ќе биде изведена во Драмски театар-Скопје. Влезот за сите настани е слободен за посетителите.
Покрај филмови и претстави, на „Скомрахи“ ќе биде промовирана и книга: „Политиката и изведувачките уметности“ од Џанел Рајнелт, која на 4 ноември на ФДУ ќе ја промовира проф. Ивана Вујиќ од Факултетот за драмски уметности во Белград.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа