Николоски: Заев ја втурна Македонија во бездна, време е за влада на национален спас
Потпретседателот на ВМРО-ДПМНЕ, Александар Николоски на гостувањето во вестите во 15 часот на телевизија Канал 5 рече дека настанот на кој денес присуствува ВМРО-ДПМНЕ, како и Алијанса на Албанците и Алтернатива е потврда на интензивната соработка со овие две партии.
-Ова е прва јавна потврда на она што го имаме, а тоа е интензивна соработка со Африм Гаши од Алтернатива и Зијадин Села од Алијанса на Албанците. Ова се идеолошки слични партии со нас. Ние сме конзервативни десни центар партии, а она што ми е драго е што овој настан е во организација на Конрад Аденауер. Оваа соработка е спонзорирана од најголемата германска фондација Конрад Аденауер, а обраќање денес има и и потпретседателот на Европската народна партија, рече Николоски.
Потпретседателот Николоски рече дека е многу важно што соработката е на идеолошка основа што, како што рече „се надевам ќе води кон покрупна соработка, затоа што нашата идеја е да се бориме против корупцијата, а шефови на корупцијата се Заев и Ахмети, затоа сакаме заедно да ја победиме корупцијата која ја предводат“.
Прашан за ставот на Бугарија да го блокира стартот на преговорите на Македонија со ЕУ, Николоски рече „разочаран сум и огорчен, сепак надежта последна умира, но ја нема многу“.
- Заев ја стави Македонија и Македонците пред свршен чин, или Македонците да се одродат или Македонија да не преговара со ЕУ што значи да не напредува. Тој избор кој го постави Заев е резултат на неговите сервилни политики. Или тоа не е избор, а тоа е така затоа што Заев ветил дека ќе испорача се што барале Бугарите и сега ѓаволот доаѓа по своето. Затоа нашето барање е владата да си поднесе оставка и да се оди на избори кога ќе има услови, а во меѓувреме да се формира влада на национален спас. Новата владата пак по изборите со политичарите кои се денес тука ќе ја извадат Македонија од бездната во која се наоѓа и во која ја доведе Заев, рече Николски.
Во однос на предвремените избори за градоначалници на Пласница и Штип, Николски рече дека утре ќе има состанок на највисоките партиски тела и ќе има одлука.
-Ние рековме дека за изборите мора да се создадат услови да се оди на избори, а не кога има ваква епидемиолошка катастрофа. Апелирам до власта заеднички да се договориме за термин кога здравствените услови ќе го дозволат тоа, рече Николоски.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа