Ники Минаж тврди дека е поканета во Белата куќа да разговара за вакцината против Ковид, Белата куќа демантира

Раперката Ники Минаж во средата тврдеше дека била поканета во Белата куќа да разговара за вакцините протов Ковид-19 откако нејзините твитови предизвикаа бурни реакции.

Но, претставник на Белата куќа вели дека ѝ понудиле телефонски повик со медицински експерти, а не посета, како што напиша таа на Твитер. Раперката во средата твитна дека била поканета поради неточни тврдења за вакцината.

Официјален претставник на Белата куќа за „Ен-би-си њуз“ изјави дека бил понуден повик до Минаж да разговара за прашања во врска со безбедноста и ефективноста на вакцината против Ковид, откако таа објави неколку твитови на почетокот на оваа недела, што доведе до тоа Твитер привремено да го суспендира нејзиниот профил.

„Како и со другите, понудивме повик со Ники Минаж и еден од нашите лекари да одговори на прашањата што ги има во врска со безбедноста и ефективноста на вакцината“, рече претставникот на Белата куќа во изјава за Ен-би-си њуз.

Рап-sвездата изминативе денови во неколку наврати го изрази својот скептицизам во врска со вакцината, а во средата објави на својот Твитер-профил дека е поканета да разговара за своите грижи со претставници на американската влада.

Ники – која неодамна посочи дека вакцината може да доведе до импотенција – напиша на Твитер: „Белата куќа ме покани и мислам дека тоа е чекор во вистинската насока. Да, ќе одам. Ќе се облечам во розова боја како Legally Blond („Русокоса од Харвард“ – филм со Рис Витерспун) за да знаат дека сум сериозна. Ќе поставувам прашања во име на лицата кои ги исмејуваат дека се едноставно луѓе. #BallGate 3. ден(sic)”

38-годишната раперка потоа ги замоли своите следачи на Твитер да ѝ ги испратат своите прашања и грижи за да им ги пренесе на официјалните лица во Белата куќа.

Во една од објавите кои предизвикаа бурни реакции, Ники, која има повеќе од 22 милиони следачи на Твитер, -напиша: „Мојот братучед во Тринидад нема да добие вакцина затоа што негов пријател ја прими и стана импотентен. Тоа се случи неколку недели пред да се ожени, сега девојката ја откажа свадбата. Затоа, молете се и бидете сигурни во вашата одлука, а не да ве тераат на тоа.“

Maкфакс

16.09.2021 - 10:41

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега