Средбата меѓу украинскиот претседател Володимир Зеленски и американскиот претседател Доналд Трамп започна денес во седиштето на Обединетите нации во Њујорк.
Украинскиот претседател Володимир Зеленски денес изјави дека неговата средба со американскиот претседател Доналд Трамп на маргините на Генералното собрание на Обединетите нации била „многу добра“, објави CNN.
Во разговор за украинскиот јавен радиодифузер „Суспилње“, Зеленски рече:
- Денешната средба беше многу добра. Прерано е да се зборува за какви било специфични елементи од средбата, малку подоцна.
Тој додаде дека средбата со Трамп била „дефинитивно најважна“.
Претседателот на САД, Доналд Трамп, изјави дека земјите од НАТО треба да соборуваат руски авиони ако влезат во воздушниот простор на алијансата, кратко откако земјите-членки на НАТО ја осудија Москва за кршење на естонскиот воздушен простор.
- Да, мислам така – им рече Трамп на новинарите кога беше прашан дали би поддржал таков потег, објави Ројтерс.
Подоцна, сепак, избегна да разјасни дали САД ќе се приклучат во акцијата за соборување на руски авиони што го нарушуваат воздушниот простор на НАТО, објави Си-Ен-Ен.
- Зависи од околностите. Но, знаете, ние сме многу строги кон НАТО – рече Трамп.
Трамп ги даде коментарите за новинарите пред средбата со украинскиот претседател Володимир Зеленски на маргините на Генералното собрание на Обединетите нации во Њујорк.
Во кратка изјава за новинарите, Зеленски рече дека главните теми на состанокот на маргините на сесијата на Генералното собрание на Обединетите нации ќе бидат моменталната ситуација на фронтовската линија во Украина, безбедносните гаранции на САД и потрагата по пат кон мир, објави Укринформ.
Зеленски претходно нагласи дека се надева дека ќе добие потврда за ветените безбедносни гаранции за време на разговорите со Трамп.
Според него, Украина и европските партнери веќе ја подготвиле основата за овие гаранции, кои Европа би била подготвена да ги прифати со целосна поддршка од Соединетите Американски Држави.
Тој, исто така, најави дека ќе го повика Трамп да воведе санкции против Русија.