Мицевски: Владејачкото мнозинство сѐ уште не е стабилно

Координаторот на пратеничката група на ВМРО-ДПМНЕ, Никола Мицевски вели дека владејчакото мнозинство сѐ уште не е стабилно.

Рече дека иако опозицијата е свесна оти Собранието не е функционално, сепак пратениците ќе поднесат барање за закажување и продолжување на четири седници.

– СДСМ и коалиционите партнери да имаа мнозинство какво што очекуваа, ќе ја продолжеа и 34-та седница во која има над 70 точки, но бидејќи немаат мнозинство во парламентот, избегнуваат да ги отвораат темите. Тоа доволно кажува за неревносното работење на парламентарното мнозинство и за несигурностите кои ги имаат во редовите одреден период. Ваквиот начин на работа покажува дека ситуацијата не е добра и наскоро ќе треба да се размислува за посериозно парламентарно мнозинство, истакна Мицевски.

– ВМРО-ДПМНЕ очекува власта да има слух за тутунарите и да се отворат прашањата кои ги засегаат овие луѓе, но очигледно власта нема слух за проблемите на оваа категорија на граѓани. По однос на тоа прашање, ВМРО-ДПМНЕ побара да се одржи посебна седница на која ќе се расправа за проблемите на тутунарите и законот за тутун. Бидејќи парламентарното мнозинство не присуствува на седниците и нема намера да работи за доброто на граѓаните, ВМРО-ДПМНЕ ќе прави кворум на таа седница и ќе учествува активно во разгледувањето на законот на тутун, бидејќи на тие луѓе мора да им се помогне, заврши Мицевски.