Меркел призна: Не можев да влијаам на Путин, веќе немав сила

Поранешната германска канцеларка Ангела Меркел изјави дека сакала да свика разговори меѓу Европа и рускиот претседател Владимир Путин годината пред воениот напад на Украина, но дека немала начин да влијае на рускиот лидер на крајот на нејзиниот мандат.

Меркел изјави за „Шпигел“ дека таа и францускиот претседател Емануел Макрон планирале да организираат независен формат за разговорите на Путин со Европскиот совет во 2021 година, последното лето од нејзиниот мандат.

„Но, јас веќе немав сила да го туркам процесот, бидејќи сите знаеја: таа заминува наесен“, изјави поранешната канцеларка.

Таа се повлече од политиката по 16 години на власт во Германија, по изборите во септември 2021 година и откако во декември му ги предаде овластувањата на Олаф Шолц од Социјалдемократскиот сојуз.

Сеќавајќи се на нејзината последна посета на Москва во август 2021 година, Меркел, која течно зборува руски, изјави за „Шпигел“: „Чувството беше јасно – во однос на политичката моќ, вие сте готови. За Путин важна е само моќта“.

Коментирајќи го нејзиното заминување од политичката сцена, таа вели „дојде време за нов пристап“ бидејќи нејзината влада не постигнала напредок, не само во Украина, туку и кога станува збор за конфликтите во Молдавија, Грузија, Сирија и Либија.

24.11.2022 - 18:03

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега