Маричиќ упати совет до младите: Бидете активни во општеството

Заменик претседателот на Владата задолжен за европски прашања, Бојан Маричиќ, на денешното „Преземање“ на Владата од страна на младите, кое претставува завршна активност од регионалната младинска конференција #ThinkForward: YOUth Action NOW!, организирана од Делегацијата на ЕУ и Europe House, им порача да бидат јасни во нивните цели, гласни и позитивни во креирањето на вредностите.

- Младинската компонента мора да ја задржиме во регионалната соработка, но и во целиот процес на интеграција во ЕУ. Работењето со младите е дел од вредностите на ЕУ, затоа е важно да се одржи младинскиот активизам жив и размената на младите исто така, затоа што тие се клучниот елемент на европската иднина на државата, рече Маричиќ пред младите од регионот.

Вицепремиерот за европски прашања Маричиќ говореше и за младинските перспективи во евроинтеграцискиот процес и можностите кои им се достапни на младите во Северна Македонија, посочувајќи ја важноста од стекнувањето лични искуства, како најдобра алатка и корист за иднината, а го истакна и значењето на младинскиот активизам, охрабрувајќи ги младите луѓе да останат активи во општеството.

- Мој совет до младите е да останат активни во општеството затоа што најголем дел од денешните креатори на политики, пред 15-20 години биле млади активисти во општеството. Кога во себе ќе ја замислите идејата и потребата да бидете дел од општеството, таа никогаш нема да заврши, посочи вицепремиерот.