Министерката за финансии, Гордана Димитриеска-Кочоска, и директорката на Светска банка, Карол Межеван, денеска го потпишаа договорот за грант од 13,56 милиони евра наменет за модернизација на сообраќајот. Овие средства се дел од поширокиот проект за олеснување на трговијата и транспортот на Западен Балкан, чија вкупна вредност изнесува 26,2 милиони евра.
Главната цел на овој проект е воведување на Интелигентен транспортен систем (ITS) на Коридорот 10, на потегот од Табановце до Велес. Проектот вклучува и опремување на Национален центар за управување со сообраќајот кој ќе ги покрива коридорите 8 и 10.
„Ова е клучно за унапредување на патната инфраструктура, што е приоритет на оваа Влада. Проектот ќе овозможи олеснување на трговијата и директно намалување на трошоците за компаниите“, истакна министерката Димитриеска-Кочоска.