Ковачевски до Ковачки: Ме напаѓа кодош, шпион и дезертер од АРМ

Жестока е атмосферата во собранието. Премиерот Димитар Ковачевски му одговори на пратеникот Ковачки со остри зборови.

„Одговорот на прашањето ќе Ви го дадам на Вас. Бидејќи во ова Собрание дадов заклетва, како највисока и света обврска дека ќе го почитувам Уставот и законите и дека ќе работам за Вас, граѓаните.

Бидејќи вие граѓаните заслужувате да ги знаете сите информации, факти и да знаете кој е каков, и како политичар и како човек пред се!

Јас, Димитар Ковачевски, од самиот почеток како премиер ветив дека ќе ја зборам само вистината, директно, цело време!
Во 2000-тата година согласно сите законски процедури, базирани на Законот за одбрана од 1992 година, член 51 и во рамки на јавна, повеќестепена процедура, врз основа на мислење на стручни лица-доктори на медицина, а заради мој здравствен, абдоменален проблем, со кој сеуште се соочувам, се регистрираше мојата неможност за служење на воената обврска.

Не јас самиот, не моето семејство, туку непознати за мене лица, во регрутните комисии констатирале таков факт!

И тоа во 2000-тата година, пред да се случи воениот конфликт и криза во 2001 година!

Ниту сум бил првиот ниту последниот таков случај, базиран на објективна медицинска состојба!

Јасно, гласно, прецизно, целосно ја соопштував и ја соопштувам вистината“, потенцираше Ковачевски.

„Оваа група овде на опозицијата(покажува со рака) и претходниот говорник како нивен предводник, а под налог на неговиот налогодавач, во последно време имаат голем, многу голем проблем! Бидејќи се лопови, криминалци, неработници, насилници, кодоши!

Бидејќи се растураат внатре помеѓу себе заради делење на пари и тендери, како овој последниот од 136 милиони евра!
Како што цело раководство им е осудено на десетици години затвор за криминал!

Имаат голем проблем бидејќи народот повторно ги прочита дека освен криминал и фотелји, за Вас почитувани граѓани, воопшто не се заинтересирани. И видете, кој човек говори за војска, за неспособност и за манипулации?

Човек кој додека бил во АРМ кодошел, крадел документи, навредувал колешки и колеги, издавал информации, тргувал со нив со разни интерни и странски структури! Човек кој бил казнуван и санкциониран!

Човек кој ми го спомнува мојот драг покоен роднина кој го заврши својот живот заради трагичната и прерана загуба на своите најмили, своите две деца! Бог да ги прости.

Човек кој што му бил колега, којшто го споменува и бил именуван од Пауновски од ВМРО-ДПМНЕ.

Човек кој ја срамел Армијата, работел против својата држава за пари и за интереси на странски и домашни разузнавачко-бизнис структури!

И затоа не е случајно што тој дезертираше од АРМ по нашиот влез во НАТО, затоа што нема да добие ни пропусница за влез во зграда, а камоли безбедносен сертификат! Бидејќи во АРМ како дел од НАТО нема место за кодоши“, вели Ковачевски.

„Почитувани граѓани, знаете што е дефиниција, што е прототип на дезертер?
Е тоа е човекот што тука платен со народни пари збореше пред мене!
Дезертер кој ја посрамотил униформата, ја погазил свечената воена заклетва, му ги симнале аполетите и облекол сако за да во Белата Палата го прави она што очигледно најдобро го знае да го прави!

Да кодоши, да пљука и по мртви и по живи, и да прави пари кодошејќи ја својата држава, Армија и граѓани!
Тоа е мизерија! Беда! Срамота!

За таа движечка мизерија и дезертерски кодош секој кажан збор повеќе е потрошено време! Мислам дека за него е итно потребна конзилиарна медицинска проверка!
На крај, уште само накратко!
Во 2001-та година, јас бев во Македонија, и во Скопје, но и во Куманово, и му помагав на мојот татко, градоначалникот од СДСМ, на моите сограѓани кумановци, како да се смират тензиите, како кумановчани да добијат вода, како да заврши конфликтот со Рамковниот Договор!
Јас не избегав од државата. Напротив, останав тука.

А екипата на ДПМНЕ фаќаше кривини по грчките плажи и профитираше правејќи воен криминал!
И денес 20 години подоцна, јас во првите редови се борам за државата, за граѓаните!

Од сабајле до вечер! За повисоки плати, за повисоки пензии, за најниска цена на струјата во регионот, за намалување на инфлацијата, за безбедност, за здравје, за ред и поредок!

Е затоа им сметам, драги граѓани на оваа криминална структура овде, на овој дезертер и срам за АРМ!
Затоа што работам вредно, затоа што сум чесен, затоа што како Влада имаме успеси!
Затоа што од авион се гледа разликата помеѓу нас(покажува на десно) и тие од криминалното ДПМНЕ!
Конечно, АРМ се спасила што овој човек, дезертер и кодош, го нема повеќе во своите редови!
Се прочистила од овој срам и мизерија од човек!
На следните парламентарни избори, за среќа, убеден сум, и Собранието ќе се исчисти и прочисти од него и таквите како него!
Почитувани граѓани, бидете спокојни, државата е во сигурни и цврсти раце“, кажа Ковачевски.

29.09.2022 - 12:38

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега