„Филипс“ повлекува дел од респираторите поради опасност по здравјето

Производителот на медицински помагала во Холандија, „Филипс“ објави дека ќе повлече дел од респираторите поради опасност од распаѓање на пената во ситни, токсични честички што можат да предизвикаат рак.

Пената се користи за придушување на звукот на уредот и може да се распадне во честички кои лесно се вдишуваат и ги иритираат дишните патишта, се вели во соопштението на компанијата.

Пената се распаѓа и формира гасови кои исто така можат да бидат токсични и вклучуваат ризик од рак, се додава во соопштението.

Компанијата ќе повлече помеѓу три и четири милиони респиратори и апарати за помош при дишење во случај на апнеја при спиење, изјави извршниот директор на „Филипс“, Франс ван Хаутен.

„Филипс“ во својот деловен извештај за првиот квартал објави дека издвоил 250 милиони евра за решавање на проблемот, а сега планира да издвои уште 250 милиони.

„ Ќе ги искористиме сите наши капацитети и ќе се фокусираме единствено на замена и поправка на овие уреди“, рече Ван Хаутен, додавајќи дека за нив веројатно ќе треба една година.

Затоа нема да можеме да им служиме на нови клиенти, „така ќе има недостиг во областа“, додаде шефот на холандската компанија.

Макфакс