Дебранец наместо да седи во самоизолација, си се возел со автомобил

Kривична пријава заработи 61 годишен жител на Дебар кој наместо во изолација се возел со автомобил.

Според Стефан Димоски, портпарол на Секторот за внатрешни работи, кривичната пријава против Р.Д.(61) е поднесена поради постоење основи на сомнение за сторено казнено дело „непостапување според здравствените прописи за време на епидемија“.

– При контрола извршена на први овој месец полициските службеници од дебарското оделение за внатрешни работи, го затекнале пријавениот во неговиот патнички автомобил и констатирале дека тој не се придржува до решението за лекување и 14 дневна домашна изолација, издадено од Државниот здравствен и санитарен инспекторат, изјави Димоски.

Додава дека со тоа, пријавениот постапил спротивно на прописите за спречување на појава, внесување, рано откривање, спречување на ширењето на коронавирусот.

Димоски исто така информираше дека според статистичките податоци на ОВР – Дебар, во последното деноноќие издадени се три прекршочни платни налози за неносење заштита маска. Полициските службеници на ова одделение,кое со својата актвност ја покрива и општина Центар Жупа, овој месец издале седумдесеттина вакви платни налози.