Чулев: Димовски треба кривично да одговара за случајот Онишченко, а не да бега да биде амбасадор во Париз

Наќе Чулев од ВМРО-ДПМНЕ на гостување во емисијата „Заспиј ако можеш“ што се емитува на телевизија Алфа оцени дека она што се успешни реформи за Оливер Спасовски е само причина за срам.

„Треба да се зголеми отчетноста на безбедносните служби не може под плаштот безбедносна тајна да се испраќаат закани до медиумите и истражувачките новинари. Пет години бев директор на Агенција за разузнавање и сметам дека имаат право да истражуваат за законитоста па така немам ни една претставка поднесено, ни една кривична пријава кон претставници на медиуми“, рече Чулев.

Тој се осврна и на случајот Онишченко укажувајќи на тоа што собраниската надлежна комисија не може да одржи состанок.

„Внатрешната контрола во Агенција за национална безбедност не постои, нема раководител. Оттука кој ќе врши контрола за професионалноста кога нема внатрешна контрола. Зошто Виктор Димовски  не реагирал за ова, не го пополнил тоа место, тоа е законска обврска. Внатрешна контрола е таа која треба да ги преиспита професионалните стандарди и сега директорот кој треба кривично да одговара за случајот Онишченко дава отчет пред собрансиката комисија. Изјавите кои ги даде по комисијата не личеше на него. Не смее директор да се заканува на пратеници, па тој не дава сертификати на истакнати лица, ама дава пасош на лица како Онишенко“, рече Чулев.

Според него Димовски треба да се соочи со кривина одговорност, а не да бега да биде амбасадор во Париз. Додаде дека безбедносниот систем е на дно, а Виктор Димовски директно влијае на истрагата, бидејќи тој не е разрешен од директорската позиција од страна на Владата

„Во моментот луѓе кои се опозицијата кои се идеолошки некомпатибилни а се дел од, безбедносниот сектор или кои претставуваат на било кој начин професионалната конкуренција на овој врв во безбедносните служби се елиминираат преку не издавање на безбедносни сертификати. Односно со фабрикување на лазни информации се со цел за недобивање на безбедносни сертификати“, рече Чулев.

Додаде дека АНБ го има монополот и се она што значи про-опозициски настроени луѓе од безбедносниот сектор  сите тие имаат проблеми со безбедносните сертификати.

„Има цела палета на луѓе кои стварно имаат професионален интегритет  и оперативно аналитичко па и техничко искуство  кои заради недобивање на безбедносни сертификати се надвор од безбедносниот систем“, вели Чулев.

Чулев истакна дека во случајот со Онишченко воопшто не е испочитуван членот 8 од законот за АНБ.

„Човек од ваков габарит како Онишченко штом влегува во Македонија, АНБ треба да знае уште од граничен премин дека он е веќе дојден на територија на Република Македонија и со целокупната оперативна мрежа да го покрие“, изјави Чулев.

Тој посочи дека не е можно АНБ и Агенцијата за разузнавање да не детектира дека ваков човек е на територија на Македонија.

„Виктор Димовски моментално продолжува да биде директор на АНБ, па дури и се заканува на пратеници. Со самото негово присуство во АНБ и неговото не разрешување од страна на Владата он директно влијае на истрагата“, дециден е Чулев