Целиот политички врв му честиташе на Георгиевски- „Дејан, ти си нашиот олимписки херој“
Освоениот сребрен медал на таеквондистот Дејан Георгиевски на Летните олимписки игри во Токио на Фејсбук му го честиташе премиерот Зоран Заев кој напиша дека успехот е историски.
– Историски успех за младиот Дејан Георгиевски. Од сѐ срце им честитам на Дејан и на неговиот тим, коишто успешно се изборија за заслужениот медал. Нека овој успех биде поттик за сите, дека со љубов, истрајност и напорна работа, успесите се неминовни, напиша Заев на Фејсбук.
Министерот за надворешни работи Бујар Османи, пак, на својот фејсбук-профил напиша дека Дејан Георгиевски е нашиот нов спортски амбасадор.
– Се враќа дома со сребрен медал. После 20 години еве нѐ пак на пиедесталот на олимписките игри. Нека ни е честито!, напиша шефот на дипломатијата.
Претходно и шефот на државата Стево Пендаровски го честиташе на Фејсбук успехот на 22-годишниот Георгиевски, кој попладнево освои сребрен медал на ЛОИ Токио 2020 откако по голема борба во финалето во категоријата над 80 килограми загуби од Русинот Владислав Ларин.
– Сребрениот вреден како злато. Дејан, ти си нашиот олимписки херој. Твојот успех е историски за Северна Македонија, напиша претседателот Пендаровски.
На својот фејсбук-профил успехот на македонскиот олимпиец му го честиташе и министерот за натрешни работи Оливер Спасовски, кој напиша дека со освоеното сребро Георгиевски и донел на државата голема радост и чест.
– Одличен настап кој ќе продолжи да ги инспирира генерациите во иднина да вложуваат во спортот, да целат кон највисоките врвови и да го обединуваат нашиот народ со бројни победи, напиша министерот Спасовски.
Лидерот на опозициската ВМРО-ДПМНЕ Христијан Мицкоски на Фејсбук напиша дека ова е историски резултат и дека заслужни за успехот на Георгиевски се и браќата Дарко и Борче Костовски кои, како што вели, „во Дејан гледаа и заеднички направија шампион“.
– Дејане, шампионе, донесе радост на Македонија. Вака се сака и брани црвено жолтата, со чест, со одлучност и достоинство. Денес таеквондо Бутел се радува, Македонија може да слави, напиша Мицкоски на Фејсбук.
Дваесет и двегодишниот Дејан Георгиевски попладнево освои сребрен медал на ЛОИ Токио 2020 откако по голема борба во финалето во категоријата над 80 килограми загуби од Русинот Владислав Ларин.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа