Апокалиптични сцени од Шри Ланка - во поплавите досега загинаа 17 луѓе
Бројот на жртвите од поплавите и одроните на земјиштето во Шри Ланка се искачи на 17, а илјадници луѓе беа принудени да ги напуштат своите домови.
Во десет области на островот, вклучително и главниот град Коломбо, каде наврна голема количина дожд, нивото на водата се намалува, но предупредувањето за свлечиште е сè уште во сила, објави Центарот за управување со катастрофи на владата во Шри Ланка, пренесува „Ројтерс“.
Исто така, се наведува дека повеќе од 270.000 луѓе биле погодени од оваа катастрофа, и дека околу 100.000 згради останале без електрична енергија.
Владата претходно објави податоци кои покажуваат дека повеќе од 4.300 луѓе биле раселени во привремени засолништа и дека биле оштетени речиси 800 куќи.
Природната катастрофа се случи во време кога Шри Ланка се надева дека ќе ги ублажи ограничувањата во борбата против коронавирусот, а едномесечното блокирање поради третиот бран инфекции треба да заврши на 14 јуни.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
